Khud ko hum ba-waqaar karte hain
Zikr-e-parwardigaar karte hain

Naam le kar khuda-e-waahid ka
Hum zabaan mushk-baar karte hain

Dil mein yaad-e-khuda basaate hain
Aur dil ka singhaar karte hain

Noor-e-parwardigaar-e-aalam se
Apni shab ko nahaar karte hain

Uss ki hi nusrat-o-himaayat se
Mushkilon ko bahaar karte hain

Uss ki rahmat se aur inaayat se
Zindagi laala-zaar karte hain

Maang kar hum dar-e-ilaahi se
Khud ko hum taajdaar karte hain

Uss ke dar se jo phirte hain Aarif
Khud ko do jag mein khwaar karte hain