Ho Jaaye Karam Hum Pe Ae Rahmaan Musalsal
Hum Hain Tere Darbaar Ke Darbaan Musalsal

Taareeki-e Isyaan Se Nikalne Ki Talab Hai
Roshan Ho Dil-o Jaan Ka Imaan Musalsal

Tera Hi Sahaara Hai, Tera Hi Hai Bharosa
Tu Hi Hai Hamaara To Nigehbaan Musalsal

Lab Pe Ho Sada Tazkira-e Sayyid-e Abraar
Dil Karta Rahe Hamd Ka Elaan Musalsal

Toofaan-e Hawaadis Mein Na Ghabraayen Kabhi Hum
Thaame Rahe Hum Ko Tera Paimaan Musalsal

Har Saans Mein Shaamil Ho Teri Yaad Ki Khushboo
Dil Mein Ho Tera Zikr Hi Mehmaan Musalsal

Az Sadqa-e Hasnain-o Ali Faatima Zahra
Kashkol Mein Bharta Rahe Irfaan Musalsal

Duniya Ki Tag-o Do Se Mile Rooh Ko Raahat
Padhte Rahen Hum Aayat-e Quraan Musalsal

Daarain Ki Aafaat Se Hum Ko Ho Rihaayi
Ho Hum Pe Sada Rahmat-e Ghufraan Musalsal

Maqsood Ho Bas Teri Raza Ae Mere Maula
Likhte Rahen Hum Hamd Ke Deewaan Musalsal

Tujh Se Hi Talabgaar-e Ataa Hai Tera Aarif
Tu Bakhsh De Taskeen Ka Saamaan Musalsal