Bakht-e-Khwaabida Ko Hum Achha Karein

Bakht-e-Khwaabida Ko Hum Achha Karein
Ahmad-e-Mukhtaar Ka Charcha Karein

Barkat-e-Zikr-e-Shah-e-Abrar Se
Hum Bhi Apne Naam Ko Ooncha Karein

Jis Jagah Mehfil Saje Sarkar Ki
Aisi Mehfil Mein Sada Aaya Karein

Un Ko Qudrat Hai Yeh Qaadir Se Mili
Jab Jahaan Chaahein Wahaan Jalwa Karein

Pesh Karte Hain Unhein Patthar Salaam
Aur Shajar Aakar Unhein Sajda Karein

Rukh Ho Be-Parda To Roshan Din Rahe
Raat Ho Jaaye Agar Parda Karein

Dooba Sooraj Bhi Palat Aaye Hai
Ek Ishaare Se Qamar Tukda Karein

Bik Na Jaayein Kyon Dar-e-Sarkar Par
Kyon Na Hum Aisa Haseen Sauda Karein

Maskan-e-Arif Bane Jannat-Numa
Shah-e-Deen Ghar Mein Agar Jalwa Karein