Zikr-e-Aaqa Se Muhabbat Kijiye

Zikr-e-Aaqa Se Muhabbat Kijiye
Apni Hasti Ki Tahaarat Kijiye

Un Ke Dar Ki Bas Gadaai Chaahiye
Un Se Hi Bas Isti’aanat Kijiye

Chhediye Charcha Unhin Ka Subh-o-Shaam
Un Ki Midhat Apni Aadat Kijiye

Noor Un Ka Hai Munawwar Har Taraf
Dil Ki Aankhon Se Ziyaarat Kijiye

Rab Ta’ala Ki Ita’at Hai Yahi
Sarwar-e-Deen Ki Ita’at Kijiye

Khwaahish-e-Deedaar-e-Sarwar Hai Agar
Har Ghadi Qur’aan Tilaawat Kijiye

Chaahiye Gar Aap Ko Rab Ki Khushi
Nafs-e-Zaalim Se Baghaawat Kijiye

Aankh Mein Takleef Aa Jaaye Agar
Khaak-e-Paaye Shah Se Raahat Kijiye

Aap Ke Dil Mein Hai Yaad-e-Mustafa
Khush-Naseebi Par Masarrat Kijiye

Jis Ke Dil Mein Ulfat-e-Sarkar Hai
Toot Kar Us Se Muhabbat Kijiye

Jis Ke Seene Mein Hai Bughz-e-Mustafa
Us Ki Har Lamha Malaamat Kijiye

Seerat-e-Sarkar Rakh Kar Saamne
Gham Ke Maaron Ki Iyaadat Kijiye

Kooye Taiba Ko Bana Kar Apna Ghar
Baagh-e-Jannat Mein Sukoonat Kijiye

Karbala Walon Ki Jur’at Dekh Kar
Haq Pe Marne Ki Jasaarat Kijiye

Ho Karam “Arif” Pe Bhi Shah-e-Umam
Banda-e-Aasi Pe Rehmat Kijiye