Ham Ko Jannat Men Na Bas Tooba O Kausar Chahiye

Ham ko jannat men na bas Tooba-o-Kausar chahiye
Bagh-e-Firdous-e-bareen men deed-e-Sarwar chahiye

Ham ko khwahish hai Madinah dekhne ki is liye
Kocha-e-Taibah men boo-e-zulf-e-dilbar chahiye

Kya gharaz ham ko asa-o-khirqa-o-kashkool se
Bas dar-e-mahboob ka mast-o-qalandar chahiye

Murdah dil ko ek pal men zindagi mil jaaye gi
Ae makeen-e-arsh teri ek thokar chahiye

Zeb-o-zeenat zaahiri kis kaam ki hai dosto
Haan magar baatin ki aaraish ka zeewar chahiye

Hukmraani ke liye laazim nahin teer-o-tabar
Haan magar is ke liye qalb-e-muattar chahiye

Khushk zaahid ban ke koi faaydah haasil na ho
Jaam, ishq-e-Mustafa ka, aur saaghar chahiye

Soz-e-bu Bakr-o-Umar, ishq-e-Bilaali chahiye
Hum ko phir sarmaya-e-mihraab-o-mimbar chahiye

Lan-taraani se nahin milti waqaar-e-zindagi
Qalb-e-Usmaan chahiye aur zarf-e-Haydar chahiye

Tu hamaari aarzoo hai, tu hamaari justju
Tere dar par mar mitein, aisa muqaddar chahiye

Sair-e-gulzar-o-chaman, tum ko mubarak bulbulo
Aur Aarif ko faqat mahboob ka dar chahiye