Kaash Ho Yeh Khushi Madine Mein

Kaash ho yeh khushi Madine mein
Maut aaye miri Madine mein

Main bhi ban jaaoon mal ke rashk-e-qamar
Khaak-e-paaye Nabi Madine mein

Rakh ke nalayn-e-paak sar pe kahoon
Mil gayi sarwari Madine mein

Un ke dar par badha ke dast-e-sawaal
Ho gaye hain ghani Madine mein

Is liye jaan-o-dil se hai peyaara
Hain Khuda ke Nabi Madine mein

Jis ne dekha hai ishq se Taibah
Ho gaya jannati Madine mein

Kar le Maula! miri duaa ko qabool
Ho meri haazri Madine mein

Ik tamanna hai aur Aarif ki
Padh le naat-e-Nabi Madine mein