Koocha e Yaar Mein Jaenge Machal Kar Hum Bhi

Koocha-e-yaar mein jaaein ge machal kar hum bhi
Khaak-e-dar sar pe sajaayein ge machal kar hum bhi

Kooye mahboob men lootein ge maze rahmat ke
Lazzat-e-deed uthayein ge machal kar hum bhi

Aap ki chashm-e-karam ham pe uthe gi ik din
Noor-e-rahmat men nahaayein ge machal kar hum bhi

Ro-baru jaali-e-athar ke ba-chashm-e-giryaan
Apni roodaad sunayein ge machal kar hum bhi

Un ke na’layn ko aankhon se laga kar ik roz
Apni qismat ko jagaayein ge machal kar hum bhi

Kulfat-o-dard bhi seene se laga len ge hum
Dard ko had se badhayein ge machal kar hum bhi

Apne abru ke ishaare se jo wo qatl karein
Phir bhi gardan na hilaayein ge machal kar hum bhi

Apne Sarkar ki jannat si gali koochon mein
Apni palkon ko bichhayein ge machal kar hum bhi

Hain isi aas mein Aarif se bahut deewaane
Khema Taybah mein lagayein ge machal kar hum bhi