Zabaan-e-Madh O Sataish Meri Banaam-e-Ali

Zabaan-e-Madh O Sataish Meri Banaam-e-Ali
Hai Tishna Rooh Meri Bhi Bara-e-Jaam-e-Ali

Tulu-e-Subh-e-Ali Se Hai Mehr Sharmindah
Hazaar Subh-e-Munawwar Fida-e-Shaam-e-Ali

Unhin Ki Chashm-e-Inayat Se Marifat Ka Maqaam
Har Aasman-e-Wilayat Mein Hai Nizaam-e-Ali

Kahan Se Aayi Chaman Mein Ada Tabassum Ki
Shaguftagi Mein Gulon Ki Hai Ibtisaam-e-Ali

Safar Kathin Hai To Phir Zaad-e-Raah Le Ke Chalo
Har Ek Mod Par Kaam Aaye Ehteraam-e-Ali

Use Rihayi Ka Parwana Qaid-e-Dozakh Se
Jo Aa Gaya Hai Naseeba Se Zer-e-Daam-e-Ali

Faraaz-e-Arsh Se Aala Hai Farsh-e-Raah Un Ka
Kise Khabar Ke Kahan Hai Ulu-e-Baam-e-Ali

Hai Naqsh-e-Pa-e-Ali Manzil O Muraad-e-Wali
Khayal-e-Ahl-e-Nazar Se Wara Maqaam-e-Ali

Ali Ali Hai Zabaan Par Ali Ali Dil Mein
Wazifa Rooh O Dil O Jaan Ka Hai Naam-e-Ali

Karam Se Aas Mein Un Ke Lagaye Baitha Hoon
Zaroor Denge Mujhe Mansab-e-Ghulam-e-Ali

Maqaam-e-Khwaab-e-Ali Ka Main Kya Kahoon Ilmi
Nabi Ka Bistar-e-Aqdas Hai Aur Manaam-e-Ali