Kuch Is Tarah Se Apne Gunahon Ko Kam Karein

Kuch is tarah se apne gunahon ko kam karein
Yaad-e-nabi se chashm-e-tamanna ko nam karein

Sarkaar hum ghulaamon pe nazar-e-karam karein
Mitti hamaari khaak-e-madina mein zam karein

Phir bhi na ho sakega ada haqq-e-ahl-e-bait
Gar khoon-e-dil se qissa-e-karbala raqam karein

Jaan-e-murad, kaan-e-tamanna hain jab huzoor
Aao unhi ke dar pe dil-o-jaan kham karein

Munkar nakeer sar pe hain haami koi nahi
Aasi pe ab karam aye shafi-e-umam karein

Rishta rasool-e-paak se mazboot chahiye
Gar aarzoo-e-behisht mein jaane ki hum karein

Mil jayega waqar hamein phir jahaan mein
Dil gar fida-e-sayyad arab-o-ajam karein

Aarif ko apne daaman-e-rahmat mein dein panaah
Itni ata aye dafe-e-ranj-o-alam karein