Mohabbat Ka Paygham Sab Ko Sunane

Mohabbat ka paygham sab ko sunane
Nabi aa gaye hain, Nabi aa gaye hain

Hamein nekiyon ki dagar pe chalane
Nabi aa gaye hain, Nabi aa gaye hain

Zamane mein phaili thi har simt zulmat
Fizaon mein raqsan thi har simt wahshat
Woh zulmat mitane, woh wahshat bhagane
Nabi aa gaye hain, Nabi aa gaye hain

Taras jaa rahi thi mohabbat ko duniya
Kahin par thi nafrat kahin bughz o keenah
Mohabbat ki, ulfat ki baatein batane
Nabi aa gaye hain, Nabi aa gaye hain

Malaik aur jan o bashar keh rahe hain
Shajar aur hajar khushk o tar keh rahe hain
Woh dekho hidayat ki shamma jalane
Nabi aa gaye hain, Nabi aa gaye hain

Suno kaj kulaho suno badshaho!
Na ab zulm ke teer hum par chalao
Masaib ke tufan se hum ko bachane
Nabi aa gaye hain, Nabi aa gaye hain

Woh Qur’an woh Furqan woh Yaseen o Taha
Do aalam ki shahi unhi ko hai zeeba
Bane jin ki khatir ye sare zamane
Nabi aa gaye hain, Nabi aa gaye hain

Kamaal unka aisa, jamal unka aisa
Nahi hai zamane mein koi bhi un sa
Haqeeqat hai ye koi qisse na maane
Nabi aa gaye hain, Nabi aa gaye hain

Gharana Nabi ka hai aisa gharana
Jinhain khud Khuda ne kiya hai muzakka
Hain qurban un par sabhi ke gharane
Nabi aa gaye hain, Nabi aa gaye hain

Aye ‘Aarif’ milegi use hi sa’adat
Use hi milega bilaa ribb jannat
Jo dil se mohabbat kare un ko maane
Nabi aa gaye hain, Nabi aa gaye hain