Rehmat Na Kis Tarah Ho Gunahgaar Ki Taraf

Rehmat na kis tarah ho gunahgaar ki taraf
Rehmaan khud hai mere tarafdaar ki taraf

Jaan-e-janaa hai dasht-e-Madeena teri bahaar
Bulbul na jayegi kabhi gulzaar ki taraf

Inkaar ka wuqoo to kya ho kareem se
Mael hua na dil kabhi inkaar ki taraf

Jannat bhi lene aaye to chhodein na yeh gali
Munh pher baithein hum teri deewaar ki taraf

Munh us ka dekhti hain bahaarein behesht ki
Jis ki nigaah hai tere rukhsaar ki taraf

Jaa bakhshiyaan Maseeh ko hairat mein daaltin
Chup baithe dekhte teri raftaar ki taraf

Mehshar mein aaftaab udhar garm aur idhar
Aankhein lagi hain daaman-e-dildaar ki taraf

Phaila hua hai haath tere dar ke saamne
Gardan jhuki hui teri deewaar ki taraf

Go be-shumaar jurm hoon go be-adad gunaah
Kuchh gham nahi jo tum ho gunahgaar ki taraf

Youn mujh ko maut aaye to kya poochhna mera
Main khaak par nigaah dar-e-yaar ki taraf

Kaabe ke sadqe dil ki tamanna magar yeh hai
Marne ke waqt munh ho dar-e-yaar ki taraf

De jaate hain muraad jahaan maangiye wahan
Munh hona chahiye dar-e-sarkaar ki taraf

Rokegi hashr mein jo mujhe pa shikastagi
Daudenge haath daaman-e-dildaar ki taraf

Aahain dil-e-aseer se lab tak na aayi thin
Aur aap daude aaye giptaar ki taraf

Dekhi jo bekasi to unhein reham aa gaya
Ghabra ke ho gaye woh gunahgaar ki taraf

Batti hai bheek daudte phirte hain be-nawa
Dar ki taraf kabhi kabhi deewaar ki taraf

Aalam ke dil to bhar gaye daulat se kya ajab
Ghar daudne lageen dar-e-sarkaar ki taraf

Aankhein jo band hon to muqaddar khule Hasan
Jalwe khud aayein talib-e-deedaar ki taraf