Utha Do Parda Dikha Do Chehra

Utha do parda dikha do chehra ke noor-e-baari hijaab mein hai
Zamaana taareek ho raha hai ke mehr kab se naqaab mein hai

Nahi wo mithi nigaah waala khuda ki rehmat hai jalwa farma
Ghazab se unke khuda bachaaye jalaal-e-baari itaab mein hai

Jali jali boo se uski paida hai sozish-e-ishq-e-chashm-e-waala
Kabaab-e-aahu mein bhi na paaya maza jo dil ke kabaab mein hai

Unhi ki boo maaya-e-saman hai unhi ka jalwa chaman chaman hai
Unhi se gulshan mehak rahe hain unhi ki rangat gulaab mein hai

Teri jalwa mein hai maah-e-tayyaba hilaal har marg o zindagi ka
Hayaat-e-jaan kaar-e-kaab mein hai mamaat-e-a’daa ka daab mein hai

Siyah libaasaan-e-daar-e-dunya o sabz poshaan-e-arsh-e-a’la
Har ik hai unke karam ka pyaasa ye faiz unki janaab mein hai

Wo gul hain lab hain naazuk unke hazaaron jharte hain phool jin se
Gulaab gulshan mein dekhe bulbul ye dekh gulshan gulaab mein hai

Jali hai soz-e-jigar se jaan tak hai taalib jalwa-e-mubaarak
Dikha do wo lab ke aab-e-haywaan ka lutf jin ke khitaab mein hai

Khade hain munkar nakeer sar par na koi haami na koi yaawar
Bata do aakar mere paighambar ke sakht mushkil jawaab mein hai

Khuda-e-qahhaar hai ghazab par khule hain badkaariyon ke daftar
Bacha lo aakar shafee-e-mahshar tumhaara banda azaab mein hai

Kareem aisa mila ke jiske khule hain haath aur bhare khazaane
Batao aye mufliso! ke phir kyun tumhaara dil iztiraab mein hai

Gunah ki taareekiyan ye chhaayin umand ke kaali ghataayin aayin
Khuda ke khursheed mehr farma ke zarra bas iztiraab mein hai

Kareem apne karam ka sadqa la-eem-e-be-qadar ko na sharma
Tu aur Raza se hisaab lena Raza bhi koi hisaab mein hai