Ya Ilahi Har Jagah Teri Ata Ka Saath Ho

Ya Ilahi har jagah teri ata ka saath ho
Jab pare mushkil shah-e-mushkil kusha ka saath ho

Ya Ilahi bhool jaun naz’a ki takleef ko
Shadi-e-deedar husn-e-mustafa ka saath ho

Ya Ilahi ghor-e-tera ki jab aaye sakht raat
Unke pyare munh ki subah-e-jaanfiza ka saath ho

Ya Ilahi jab pare mahshar mein shor-e-darogir
Aman dene wale pyare peshwa ka saath ho

Ya Ilahi jab zabanein bahar aayeen pyaas se
Sahib-e-kausar shah-e-jood o ata ka saath ho

Ya Ilahi sard mihri par ho jab khurshid-e-hashr
Sayyad be-saye ke zill-e-lawa ka saath ho

Ya Ilahi garmi-e-mahshar se jab bhadke badan
Daman-e-mahboob ki thandi hawa ka saath ho

Ya Ilahi nama-e-a’mal jab khulne lagen
Aib posh-e-khalq sattar-e-khata ka saath ho

Ya Ilahi jab bahein aankhein hisab-e-jurm mein
Un tabassum rez honton ki dua ka saath ho

Ya Ilahi jab hisab-e-khandah-e-beja rulaye
Chashm-e-giryan-e-shafi-e-murtaja ka saath ho

Ya Ilahi rang laayen jab meri be-bakiyan
Un ki neechi neechi nazron ki haya ka saath ho

Ya Ilahi jab chaloon tareek rah-e-pul-sirat
Aaftab-e-hashmi noor-ul-huda ka saath ho

Ya Ilahi jab sar-e-shamshir par chalna pade
Rabbe sallam kehne wale ghamzada ka saath ho

Ya Ilahi jo dua-e-nek mein tujh se karoon
Qudsiyon ke lab se aameen rabbana ka saath ho

Ya Ilahi jab Raza khwab-e-giran se sar uthaye
Daulat-e-bedar-e-ishq-e-mustafa ka saath ho