Shukr Khuda Ke Aaj Ghadi Us Safar Ki Hai

Shukr-e-Khuda ke aaj ghari us safar ki hai
Jis par nisaar jaan falah-o-zafar ki hai

Garmi hai tap hai dard hai kulfat safar ki hai
Na-shukr yeh toh dekh azeemat kidhar ki hai

Kis khaak-e-paak ki tu bani khaak-e-pa shifa
Tujh ko qasam janaab-e-Masiha ke sar ki hai

Aab-e-hayaat rooh hai Zarqa ki boond boond
Iksir-e-azam mass-e-dil khaak-e-dar ki hai

Hum ko toh apne saaye mein aaram hi se laye
Heele bahaane waalon ko yeh raah dar ki hai

Lut-te hain maare jaate hain yun hi suna kiye
Har baar di woh amn ke ghairat hazar ki hai

Woh dekho jagmagati hai shab aur qamar abhi
Pehron nahi ke beest-o-chahaarum safar ki hai

Maah-e-Madina apni tajalli ata kare!
Yeh dhalti chandni toh pehar do pehar ki hai

Man zaara turbati wajabat lahu shafa’ati
Un par durood jin se naveed in bushar ki hai

Is ke tufail hajj bhi Khuda ne kara diye
Asl-e-muraad haaziri is paak dar ki hai

Kaaba ka naam tak na liya Taiba hi kaha
Poochha tha hum se jis ne ke nahzat kidhar ki hai

Kaaba bhi hai inhin ki tajalli ka ek zill
Roshan inhi ke aks se putli hajar ki hai

Hote kahan Khaleel-o-bina Kaaba-o-Mina
Laulaak waale saahibi sab tere ghar ki hai

Maula Ali ne waari teri neend par namaz
Aur woh bhi asar sab se jo aala khatar ki hai

Siddique balkeh ghaar mein jaan is pe de chuke
Aur hifz-e-jaan toh jaan furooz-e-gharar ki hai

Haan tu ne in ko jaan inhein pher di namaz
Par woh toh kar chuke the jo karni bashar ki hai

Saabit hua ke jumla faraiz furoo hain
Asl-ul-usool bandagi is taajwar ki hai

Shar khair shor soor sharar door naar noor!
Bushra ke baargah yeh Khair-ul-Bashar ki hai

Mujrim bulaye aaye hain ja’ook kahe gawah
Phir radd ho kab yeh shaan kareemon ke dar ki hai

Bad hain magar unhi ke hain baaghi nahi hain hum
Najdi na aaye is ko yeh manzil khatar ki hai

Tuf najdiyat na kufr na Islam sab pe harf
Kaafir idhar ki hai na udhar ki adhar ki hai

Haakim hakeem daad-o-dawa dein yeh kuchh na dein
Mardood yeh muraad kis aayat, khabar ki hai

Shakl-e-bashar mein noor-e-Ilahi agar na ho!
Kya qadar us khameer-e-maa-o-madar ki hai

Noor-e-Ilah kya hai mohabbat Habeeb ki
Jis dil mein yeh na ho woh jagah khook-o-khar ki hai

Zikr-e-Khuda jo un se juda chaaho Najdiyo!
Wallah zikr-e-haq nahi kunji saqar ki hai

Be un ke wasta ke Khuda kuchh ata kare
Haasha ghalat ghalat yeh hawas be-basar ki hai

Maqsood yeh hain Aadam-o-Nooh-o-Khaleel se
Tukhm-e-karam mein saari karamat samar ki hai

Un ki nubuwwat un ki ubuwwat hai sab ko aam
Umm-ul-Bashar uroos inhi ke pisar ki hai

Zaahir mein mere phool haqeeqat mein mere nakhl
Is gul ki yaad mein yeh sada Ab-ul-Bashar ki hai

Pehle ho un ki yaad ke paaye jila namaz
Yeh kehti hai azaan jo pichhle pehar ki hai

Duniya mazaar hashr jahan hain Ghafoor hain
Har manzil apne chaand ki manzil ghafar ki hai

Un par durood jin ko hajar tak karein salaam
Un par salaam jin ko tahiyyat shajar ki hai

Un par durood jin ko kas-e-be-kasaan kahein
Un par salaam jin ko khabar be-khabar ki hai

Jinn-o-bashar salaam ko haazir hain as-salaam
Yeh baargah Maalik-e-jinn-o-bashar ki hai

Shams-o-qamar salaam ko haazir hain as-salaam
Khoobi inhi ki jot se shams-o-qamar ki hai

Sab bahr-o-bar salaam ko haazir hain as-salaam
Tamleek inhi ke naam toh har bahr-o-bar ki hai

Sang-o-shajar salaam ko haazir hain as-salaam
Kalme se tar zabaan darakht-o-hajar ki hai

Arz-o-asar salaam ko haazir hain as-salaam
Malja yeh baargah dua-o-asar ki hai

Shoreeda sar salaam ko haazir hain as-salaam
Raahat inhi ke qadmon mein shoreeda sar ki hai

Khasta jigar salaam ko haazir hain as-salaam
Marham yahin ki khaak toh khasta jigar ki hai

Sab khushk-o-tar salaam ko haazir hain as-salaam
Yeh jalwa-gah Maalik-e-har khushk-o-tar ki hai

Sab karr-o-farr salaam ko haazir hain as-salaam
Topi yahin toh khaak pe har karr-o-farr ki hai

Ahl-e-nazar salaam ko haazir hain as-salaam
Yeh gard hi toh surmah sab ahl-e-nazar ki hai

Aansu baha ke beh gaye kaale gunah ke dher
Haathi dubao jheel yahan chashm-e-tar ki hai

Teri qaza khalifa-e-ahkaam-e-Zil-Jalaal
Teri raza haleef qaza-o-qadar ki hai

Yeh pyaari pyaari kyaari tere khana-baagh ki
Sard is ki aab-o-taab se aatish saqar ki hai

Jannat mein aake naar mein jaata nahi koi
Shukr-e-Khuda naveed najaat-o-zafar ki hai

Momin hoon mominon pe Rauf-ur-Raheem ho
Saail hoon saailon ko khushi la-nahar ki hai

Daaman ka waasta mujhe us dhoop se bacha
Mujh ko toh shaaq jaaron mein is dopahar ki hai

Maa dono bhai bete bhateeje azeez dost
Sab tujh ko sonpe milk hi sab tere ghar ki hai

Jin jin muraadon ke liye ahbaab ne kaha
Pesh-e-Khabeer kya mujhe haajat khabar ki hai

Fazl-e-Khuda se ghaib shahadat hua inhein
Is par shahadat aayat-o-wahi-o-asar ki hai

Kehna na kehne waale the jab se toh ittila
Maula ko qaul-o-qaail-o-har khushk-o-tar ki hai

Par kitaab utri bayaan-al-likulli shai
Tafseel jis mein ma-abar-o-ma-ghabar ki hai

Aage rahi ata woh ba-qadr-e-talab toh kya
Aadat yahan umeed se bhi beshtar ki hai

Be-maange dene waale ki ni’mat mein gharq hain
Maange se jo mile kise feham is qadar ki hai

Ahbaab is se barh ke toh shayad na paayein arz
Na-karda arz arz yeh tarz-e-digar ki hai

Dandaan ka naat khwan hoon na paayaab hogi aab
Nadi gale gale mere aab-e-guhar ki hai

Dasht-e-Haram mein rehne de sayyaad agar tujhe
Mitti azeez bulbul-e-be-baal-o-par ki hai

Ya Rabb Raza na Ahmed-e-Paareena ho ke jaaye
Yeh baargah tere Habeeb-e-abar ki hai

Taufeeq de ke aage na paida ho khoo-e-bad
Tabdeel kar jo khaslat-e-bad peshtar ki hai

Aa kuchh suna de ishq ke bolon mein ae Raza
Mushtaaq-e-taba lazzat-e-soz-e-jigar ki hai