Jaam ulfat ka pila do ya Rasool
Apna deewana banado ya Rasool

Meri kismet ko jaga do ya Rasool
Ek jhalak apni dikhado ya Rasool

Khwaab mein tashrif lakar ek baar
Deed ka sharbat pila do ya Rasool

Aa gaya bimaar ae mere tabib
Do shifa-e-kaamila do ya Rasool

Umr bhar teri sana khani karun
Har rukawat ko hata do ya Rasool

Wo kabhi bhi uth nahi sakta jise
Tum nigahon se gira do ya Rasool

Bakhsh dega har khata meri Khuda
Tum zara lab ko hila do ya Rasool

Chand ko ungli se mahde paak mein
Jis tarah chaho jhuka do ya Rasool

Sui mil jaaye andhera bhi ho gar
Tum jo aakar muskura do ya Rasool

Kar nahi sakta sana teri Ubaid
Do saliqa-e-sana do ya Rasool