Nasl-e-Aadam ka hai aaj tak silsila
Koi aaya nahi Fatima ki tarah

Iffat-o-sharm roz-e-azal se koi
Saath laaya nahi Fatima ki tarah

Mahwiyyat shauq-e-sajda mein hai auj par
Tool-e-sajda ke aage hai shab mukhtasar

Is ada se kisi ne kabhi to kahin
Sar jhukaya nahi Fatima ki tarah

Keh rahi hain ba-baang-e-duhal barmala
Aayesha Bint-e-Siddiq Khair-un-Nisa

Har ada jiski ho Mustafa ki ada
Maine dekha nahi Fatima ki tarah

Paikar-e-khulq-o-ta’at hain lakhon bashar
Zindagi misl-e-aaina unki magar

Har ghadi har nafas abd-e-Ma’bood ka
Haq nibhaya nahi Fatima ki tarah

Mustafa uth ke jiski jabeen choom lein
Baithne ko jagah apni masnad pe dein

Khaas pehlu mein apne kisi ko kabhi
Yun bithaya nahi Fatima ki tarah

Tark-e-duniya ke aasaar har gaam par
Paikar-e-zuhd sab hain kisi ne magar

Sabr-o-shukr-o-tawakkul ki qandeel se
Ghar sajaya nahi Fatima ki tarah

Sun ae Razi tu apni sada-e-zameer
Ghair mumkin hai aalam mein unki nazeer

Ye sharaf ke hai khoon-e-Nabi se khameer
Koi paya nahi Fatima ki tarah