Barish E Noor Men Yoon Nahaya Karo

Barish-e-noor men yoon nahaya karo
“Zikr-e-Ahmad ki mahfil sajaya karo”

Sunnat-e-Mustafa men dhalo is tarah
Dushmanon ko bhi apna banaya karo

Shahar-e-mahboob ki haazri ho naseeb
Naat-e-Sarkar yoon gungunaya karo

Har ghari tum padho Mustafa par durood
Nekiyon ka zakheera kamaya karo

Na rakho tum kisi se hasad aur jalan
Na jalo, na kisi ko jalaya karo

Gar mile khaak-e-kooy-e-Habeeb-e-jahan
Chashm-o-qalb-o-jigar men basaya karo

Jo Nabi ka nahi us ko dhut,kaar do
Jo Nabi ka hai sar par bithaaya karo

Sar,bulandi ae Aarif agar chahiye
Yad-e-Sarwar mein dil ko lagaya karo