Dar-e-Rasool Pe Dil Ko Jhuka Ke Rakha Hai

Dar-e-Rasool Pe Dil Ko Jhuka Ke Rakha Hai
Naseeb Hum Ne Bulandi Pe Laa Ke Rakha Hai

Ghubaar-e-Raah-e-Madina Hamaara Zevar Hai
Usi Ko Maathe Pe Hum Ne Laga Ke Rakha Hai

Kabhi Na Tootega Rishta Hamaara Taiba Se
Yeh Taar-e-Ishq Jigar Se Mila Ke Rakha Hai

Hamaari Aadat-o-Fitrat Hai Midhat-e-Sarwar
Unhin Ka Zikr Labon Par Saja Ke Rakha Hai

Milegi Bheek Humein Bhi Huzoor Ke Dar Se
Isi Yaqeen Pe Daaman Bichha Ke Rakha Hai

Dar-e-Nabi Ki Ghulami Hi Asl Shahi Hai
Isi Ghulami Ne Hum Ko Bacha Ke Rakha Hai

Khuda Ke Fazl Se Daaman Mein Rehmatein Hongi
Nabi Se Rishta-e-Ulfat Laga Ke Rakha Hai

Andheri Qabr Mein Kaam Aaye Is Liye Dil Mein
Chiraagh-e-Ishq-e-Paighambar Jala Ke Rakha Hai

Hamaari Fikr Se Badh Kar Karam Hai Aaqa Ka
Gunah Saare Hamaare Chhupa Ke Rakha Hai

Hamaari Fikr Muattar Hai Is Liye Arif
Khayaal-e-Shehr-e-Madina Basa Ke Rakha Hai