Hai Sana-e-Mustafa, Rab Ki Raza Naat-e-Nabi

Hai Sana-e-Mustafa, Rab Ki Raza Naat-e-Nabi
Teera O Tareek Marqad Mein Ziya Naat-e-Nabi

Mubtala-e-Dard O Gham Ki Hai Dawa Naat-e-Nabi
Noor-e-Jaan Hai, Qalb Ka Hai Aasra Naat-e-Nabi

Abu Bakr Siddiq Hon Ya Hon Umar, Usman, Ali
Hai Sahaaba Ka Wazifa Ba-Khuda Naat-e-Nabi

Fikr Ko Bakhshe Bulandi, Bandagi Ko Zindagi
Saalikaan-e-Haq Ka Rahbar, Rahnuma Naat-e-Nabi

Arsh Ki Rif’at Bataati Hai Maqaam-e-Mustafa
Farsh Par Rab Ki Raza Ka Raasta Naat-e-Nabi

Naat Ke Har Lafz Mein Hai Madhat-e-Khair-ul-Wara
Ahl-e-Imaan Ke Liye Hai Keemiya Naat-e-Nabi

Jis Se Roshan Ho Gaye Fahm O Zaka Ke Zaaviye
Fikr-e-Insaan Ke Liye Hai Irtiqa Naat-e-Nabi

Hashr Ki Mushkil Ghadi Mein Saaibaan Ban Jaayegi
Aasiyon Ke Waaste Hai Woh Rida Naat-e-Nabi

Jis Se Milta Hai Suroor-e-Daaimi Naashaad Ko
Baais-e-Taskeen-e-Jaan-e-Mubtala Naat-e-Nabi

Hum Se Aajiz Se Kahaan Mumkin Sana-e-Mustafa
Aql-e-Insaan Se Hai Be-Shak Maawara Naat-e-Nabi

Ho Ata Arif Ko Bhi Ab Lazzat-e-Soz-e-Darun
Wird-e-Lab Har Dam Rahe Hamd-e-Khuda, Naat-e-Nabi