Harz-E-Jaan Zikr-E-Shafa’at Kijeye

Harz-e-jaan zikr-e-shafa’at kijeye
Naar se bachne ki soorat kijeye
Unke naqsh-e-pa pe gairat kijeye
Aankh se chhup kar ziyarat kijeye

Unke husn-e-ba-malāhat par nisaar
Sheerā-e-jaan ki halāwat kijeye
Unke dar par jaise ho mit jāiye
Nātavāno! Kuchh to himmat kijeye

Pher dije panja-e-dev-e-la’in
Mustafa ke bal pe taaqat kijeye
Doob kar yaad-e-lab-e-shādāb mein
Aab-e-kauthar ki sabāhat kijeye

Yaad-e-qāmat karte uṭhiye qabr se
Jaan-e-mahshar par qayamat kijeye
Unke dar par baiṭhiye ban kar faqeer
Be-navā fikr-e-sarvat kijeye

Jis ka husn Allah ko bhi bha gaya
Aise pyare se mohabbat kijeye
Hay bāqi jis ki karta hai sana
Martay dam tak us ki midhat kijeye

Arsh par jis ki kamānīṇ chaṛh ga’in
Sidqe us bazu par quwwat kijeye
Neem wā tayyaba ke phoolon par ho aankh
Bulbulon! Paas-e-nazākat kijeye

Sar se girta hai abhi baar-e-gunāh
Kham zara farq-e-irādat kijeye
Aankh to uṭhti nahin kya den jawāb
Hum pe be-pursish hi rehmat kijeye

Uzr-e-badtar az gunah ka zikr kya
Be-sabab hum par inayat kijeye
Na’ra kije Ya Rasool Allah ka
Mufliso! Sāmān-e-daulat kijeye

Hum tumhare ho ke kis ke paas jāyein
Sadaqa shahzādon ka rehmat kijeye
Man raʾānī qad raʾā al-haqq jo kahe
Kya bayān us ki haqeeqat kijeye

Aalam-e-ilm do aalam hain huzoor
Aap se kya arz-e-hājat kijeye
Aap sultān-e-jahān hum be-nava
Yaad hum ko waqt-e-nemat kijeye

Tujh se kya kya ai mere tayyaba ke chaand
Zulmat-e-gham ki shikāyat kijeye
Dar-badar kab tak phirein khasta kharāb
Tayyaba mein madfan inayat kijeye

Har bars woh qāflon ki dhūm dhām
Aah suniye aur ghaflat kijeye
Phir palat kar munh na us jānib kiya
Such hai aur da’wā-e-ulfat kijeye

Aqraba hubb-e-watan be-himmati
Aah kis kis ki shikāyat kijeye
Ab to aaqa munh dikhane ka nahin
Kis tarah raf’-e-nadāmat kijeye

Apne hāthon khud luṭa baiṭhe hain ghar
Kis pe da’wā-e-bazā’at kijeye
Kis se kahiye kya kiya kya ho gaya
Khud hi apne par malāmat kijeye

Arz ka bhi ab to munh paṛta nahin
Kya ilāj-e-dard-e-furqat kijeye
Apni ik meeṭhī nazar ke shahd se
Chāra-e-zahr-e-musībat kijeye

De khudā himmat ki yeh jān-e-hazīn
Aap par wāreñ woh soorat kijeye
Aap hum se badh ke hum par mehrabān
Hum kareñ jurm aap rehmat kijeye

Jo na bhoolā hum ghareebon ko Razā
Yaad us ki apni aadat kijeye