Hum Ko Ruswai O Zillat Se Bachana Maula

Hum ko ruswai o zillat se bachana Maula
Nafs o shaitan ki shamat se bachana Maula

Zulmat-e-nafs ne ghera hai mataa-e-dil ko
Dahr ki aafat o nakbat se bachana Maula

Hum pe altaaf o inayaat ki barish karke
Kulfat o dard-e-museebat se bachana Maula

Khauf aata hai keh mahshar mein na khul jaye bharam
Hashr mein hum ko nadamat se bachana Maula

Apni rehmat ka gunahgaar pe saya karke
Susti o be-hisi, ghaflat se bachana Maula

Teri yaadon se rahe qalb, hamesha maamoor
Dil ko duniya ki mohabbat se bachana Maula

Raah-e-haq se na hatein hum kabhi marte dam tak
Hum ko baatil ki ghawayat se bachana Maula hai

Khalq ki chashm-e-malamat ka na ban jayein hadaf
Har jagah hum ko khajalat se bachana Maula

Harf-e-haq kehne ka hum ko bhi saleeqa dena
Maslahat kosh tabiyat se bachana Maula

Noor-e-imaan se munawwar, rahe Aarif hardam
Kufr o zulmat ki kasafat se bachana Maula