Labon Par Naat-E-Aqdas Ka Tarana Le Ke Aaye Hain

Labon par naat-e-aqdas ka tarana le ke aaye hain
Nijaat-e-deen-o-duniya ka wazifa le ke aaye hain

Hamara qalb maskan hai, shah-e-deen ki mahabbat ka
Durood-e-paak ka pyara sa tohfa le ke aaye hain

Gunahgaaron mein hain, par maghfirat ka ek saman hai
Hum apne saath aaqa ka wasila le ke aaye hain

Madina se juda hokar yahi kahte hain deewane
Ham apni rooh chhod aaye hain laasha le ke aaye hain

Ubur-e-bahr-e-ranj-o-gham hua hai is liye aasan
Shah-e-abrar, rehmat ka safina le ke aaye hain

Khuda-e-kul jahan ne milkiyat bakhshi hai aaqa ko
Har ek aalam mein chalta hai woh sikka le ke aaye hain

Sitare, chaand, suraj is liye roshan hain aye Aarif
Rukh-e-sarkaar se yeh noor, sadqa le ke aaye hain