Madina Khoob Se Hai Khoobsurat, Kaise Batlaaun

Madina khoob se hai khoobsurat, kaise batlaaun
Yaqeenan jannaton ki hai woh jannat, kaise batlaaun

Nazar jab aashiqon ki gumbad-e-khazra par parti hai
Barasti un par hai rehmat hi rehmat, kaise batlaaun

Fizaon mein basi hai jan-nisaaron ki mahak har soo
Wahan har ek zarre mein hai ulfat, kaise batlaaun

Nabi-e-paak ke nalain ki khushbu bikharti hai
Bhala raah-e-madina ki yeh barkat, kaise batlaaun

Na poochho chaashni milti hai kaisi kooch-e-tayyaba mein
Diyar-e-mustafa ki shaan-o-shaukat, kaise batlaaun

Seenahri jaliyon ke samne kya lazzat milti hai
Wahan aansoo bahane ki yeh raahat, kaise batlaaun

Gunaahon ki liye gathri khada hota hai jab banda
Kareem aaqa ki ho jaati hai shafqat, kaise batlaaun

Karam farma diya aaqa ne mujh laachaar bande par
Mili zarra ko kaisi aisi azmat, kaise batlaaun

Dikha kar khaana-e-kaaba madina rab ne dikhlaya
To naazaan ho gayi qismat par qismat, kaise batlaaun

Diyar-e-mustafa mein tha to jannat bhool baitha tha
Na poochho gham hui jab meri raj’at, kaise batlaaun

Zabaan khamosh thi aankhon se ek sailab jaari tha
Yahi thi aarzu phir ho ziyarat, kaise batlaaun

Jahan bin maange milta hai karam ka aisa darya hai
Jahan hoti hai har lamha sakhavat, kaise batlaaun

Nikal jaata mara dam kaash un ke paak rowze par
Chamak jaati meri khaabida qismat, kaise batlaaun

Khuda har ek aashiq ko dikhade khaana-e-kaaba
Madine ki bhi ho jaaye ziyarat, kaise batlaaun

Tasawwur mein safar tayyaba ka tumne kar liya ‘Arif’
Haqeeqat mein bhi ho jaaye ziyarat, kaise batlaaun