Rauza-E-Shaah Pe Jaane Ki Tamanna Ki Hai

Rauza-e-shaah pe jaane ki tamanna ki hai
Main ne ek naat sunane ki tamanna ki hai

Ishq ki dhooni ramaane ki tamanna ki hai
Husn ko dil mein basaane ki tamanna ki hai

Yaad-e-mehboob se dil mein hai ujala har soo
Main ne ab shamma bujhane ki tamanna ki hai

Yaar ke dast-e-karam ne hai sambhala mujhko
Laakh duniya ne girane ki tamanna ki hai

Ek thokar se maseeha ne shifa bakshi hai
Marz ne jab bhi sataane ki tamanna ki hai

Mere maashooq ke jaisa koi ho to laao
Jis ne roton ko hansane ki tamanna ki hai

“Aql hai mahw-e-tamashaye lab-e-baam abhi”
Ishq ne jaan lutane ki tamanna ki hai

Shayeri ka jo tujhe rog laga hai Aarif
Tum ne bhi rang jamaane ki tamanna ki hai