Yaad Mein Jis Ki Nahin Hosh-e-Tan-o-Jaan Hum Ko

Yaad mein jis ki nahin hosh-e-tan-o-jaan hum ko
Phir dikha de woh rukh, ae mehr-e-furozaan hum ko

Deer se aap mein aana nahi milta hai humein
Kya hi khud-rafta kiya jalwa-e-jaanaan hum ko

Jis tabassum ne gulistaan pe giraayi bijli
Phir dikha de woh ada-e-gul-e-khanda hum ko

Kaash aaveega-e-qandeel-e-madina ho woh dil
Jis ki sozish ne kiya rashk-e-chiraghaan hum ko

Arsh jis khoobi-e-raftaar ka paamal hua
Do qadam chal ke dikha sarv-e-kharamman hum ko

Sham-e-tayyaba se main parwana rahoon kab tak door
Haan jala de sharar-e-aatish-e-pinhaan hum ko

Khauf hai samaa-kharaashi-e-sag-e-tayyaba ka
Warna kya yaad nahi naala-o-afghaan hum ko

Khaak ho jayen dar-e-paak pe hasrat mit jaaye
Ya ilaahi na phira be-sar-o-samaan hum ko

Khaar-e-sehra-e-madina na nikal jaaye kahin
Wahshat-e-dil na phira koh-o-biyaabaan hum ko

Tang aaye hain do aalam teri be-taabi se
Chain lene de tap-e-seena-e-sozaan hum ko

Paon gharbaal hue raah-e-madina na mili
Ae junoon ab to mile rukhsat-e-zindaan hum ko

Mere har zakhm-e-jigar se yeh nikalti hai sada
Ae maleeh-e-arabi kar de namakdaan hum ko

Sair-e-gulshan se asiraan-e-qafas ko kya kaam
Na de takleef-e-chaman bulbul-e-bustaan hum ko

Jab se aankhon mein samayi hai madina ki bahaar
Nazar aate hain khazaan-deeda gulistaan hum ko

Gar lab-e-paak se iqraar-e-shafa-at ho jaaye
Yun na bechain rakhe joshish-e-asyaan hum ko

Nayyar-e-hashr ne ik aag laga rakhi hai
Tez hai dhoop mile saaya-e-daaman hum ko

Raham farmaayiye ya shah ke ab taab nahin
Taab ke khoon rulaaye gham-e-hijraan hum ko

Chaak-e-daaman mein na thak jaayio ae dast-e-junoon
Purze karna hai abhi jeeb-o-garebaan hum ko

Parda us chehra-e-anwar se utha kar ik baar
Apna aaina bana ae meh-e-taabaan hum ko

Ae Raza wasf-e-rukh-e-paak sunaane ke liye
Nazar dete hain chaman, murgh-e-ghazal-khwaan hum ko