Dil mein kisi ko aur basaya na jayega
Zikr-e-Rasool-e-Pak bhulaya na jayega

Wo khud hi jaan lenge, bataya na jayega
Hum se to apna haal sunaya na jayega

Hum ko jaza milegi Muhammad se ishq ki
Dozakh ke aas paas bhi laya na jayega

Kehte the ye Bilal tashaddud pe kufr ke
Ishq-e-Nabi to dil se nikala na jayega

Dozakh mein main to kya! mera saaya na jayega
Kyunke Rasool-e-Pak se dekha na jayega

Roshan rahega daagh-e-firaq-e-Shah-e-Umam
Ye wo chiragh hai jo bujhaya na jayega

Manega un ki baat Khuda hashr mein Naseer
Bin Mustafa, Khuda ko manaya na jayega