Ik main hi nahi, un par qurbaan zamana hai

Ek Main Hi Nahin, Un Par Qurban Zamana Hai
Jo Rabb-E-Do-‘Alam Ka Mahboob Yagana Hai

Kal Pul Se Hamein Jis Ne Khud Paar Lagana Hai
Zahra Ka Woh Baba Hai, Hasnain Ka Nana Hai

Us Hashmi Dulha Par Kaunain Ko Main Vaaroon
Jo Husn-O-Shamaail Mein Yakta-E-Zamana Hai

‘Izzat Se Na Mar Jaayein Kyun Naam-E-Muhammad Par
Hum Ne Kisi Din Yoon Bhi Duniya Se To Jana Hai

Aao Dar-E-Zahra Par Phaile Hue Daman
Hai Nasl Kareemon Ki, Lajpaal Gharana Hai

Hoon Shah-E-Madina Ki Main Pusht-Panahi Mein
Kya Is Ki Mujhe Parwa Dushman Jo Zamana Hai

Ye Kah Ke Dar-E-Haq Se Li Maut Mein Kuch Mohlat
Milad Ki Aamad Hai, Mehfil Ko Sajana Hai

Qurban Us Aaqa Par Kal Hashr Ke Din Jis Ne
Is Ummat-E-‘Aasi Ko Kamli Mein Chhupana Hai

Sau Baar Agar Tauba Tooti Bhi To Hairat Kya
Bakhshish Ki Riwayat Mein Tauba To Bahana Hai

Har Waqt Woh Hain Meri Duniya-E-Tasavvur Mein
Ai Shauq! Kahin Ab To Aana Hai Na Jana Hai

Pur-Noor Si Rahein Hain, Gumbad Pe Nigahen Hain
Jalwe Bhi Anokhe Hain, Manzar Bhi Suhana Hai

Hum Kyun Na Kahein Un Se Rudaad-E-Alam Apni
Jab Un Ka Kaha Khud Bhi Allah Ne Mana Hai

Mahroom-E-Karam Is Ko Rakhiye Na Sar-E-Mahshar
Jaisa Hai Naseer Aakhir Saail To Purana Hai