Ya Rab Mere Khayal Ko Husn-e-Khayal De

Ya Rab! Mere khayal ko husn-e-khayal de
Mere dil o jigar ko tu soz-e-Bilal de

Tu hi hamara haami o naasir hai ae shaha
Mujh ko gham o alam ke bhanwar se nikal de

Main jab paroon masaib o aalam mein Khuda
Sadqe mein Mustafa ke unhein sar se taal de

Ya Rab tere khazane mein kuch bhi kami nahi
Dareen ki khushi, meri jholi mein daal de

Zahir mera haseen ho, batin bhi khush numa
Mujh be-amal ko is tarah, husn o jamal de

Mangoon tujhi se sadqa mein, tere habib ka
Rauze pe Mustafa ke meri jaan nikal de

Wo haath jo uthein tere darbar mein faqat
Ae Rabb-e-kull jahan, wo dast-e-sawaal de

Dhal jaon aashiqan-e-risalat ke rang mein
Ya Rab mere wajood ko wo khad-o-khal de

Barbad kar na dein mujhe duniya ke rang o boo
Isiyan ke is diyar mein mujh ko sambhal de

Aarif ki bas yehi hai dua tujh se subah o shaam
Ishq-e-Rasool-e-Paak ke saanche mein dhal de