Allah Allah Ke Nabi Se

Allah Allah ke nabi se
Faryaad hai nafs ki badi se

Din bhar khelo.n mein khaak uraai
Laaj aayi na zarro.n ki hansi se

Shab bhar sone hi se ghrz thi
Taaro.n ne hazaar daant peese

Imaan par maut behtar ai nafs
Teri naapaak zindagi se

Ai shahd numa zehr dar jaam
Gum jaa.oo.n kidhar teri badi se

Gehre pyare puraane dil soz
Guzraa mein teri dosti se

Tujh se jo uthaaye maine sadaqe
Aise na mile kabhi kisi se

Uf re khudkaam be murawweet
Par-ta hai kaam aadami se

Tu ne hi kiya Khuda se nadim
Tu ne hi kiya khajil nabi se

Kaise Aaqa ka hukm taala
Hum mar mire teri khudsari se

Aati na thi jab badi bhi tujh ko
Hum jaante hain tujhe jabhi se

Hadd ke zaalim sitam ke kattar
Patthar sharmaa.e.n tere ji se

Hum khaak mein mil chuke hain kab ke
Nikla na ghubaar tere ji se

Hai zaalim! main nibahoon tujh se
Allah bachaaye is ghari se

Jo tum ko na jaanta ho Hazrat
Chaa.len chaliye us ajnabi se

Allah ke saamne woh gin the
Yaaro.n mein kaise muttaqi se

Rahzan ne loot li kamaai
Faryaad hai Khizar Hashimi se

Allah kue.n mein khud gira hoon
Apni naalish karoon tujhi se

Hain pusht-e-panaah Ghauth-e-Azam
Kyun darte ho tum Raza kisi se