Naat Parhne Ka Jab Se Hunar Kar Liya

Naat parhne ka jab se hunar kar liya
Hum ne roshan dil o jaan ka ghar kar liya

Uswa-e-Mustafa jis ne apna liya
Sari duniya ko zer-e-asar kar liya

Do jahan ki bhalai use mil gayi
In ki chokhat pe jis ne basar kar liya

Shafe’-e-Hashar ki rehberi mil gayi
Hum ne tay zindagi ka safar kar liya

Sarwar-e-do jahan ka karam ho gaya
Hum ne pur noor sham o sahar kar liya

Rehmat-e-Mustafa par bharosa kiya
Chutkiyon mein balaon ko sar kar liya

un ke dar ki gadaai ka aijaz hai
Hum ne shahon ke dil mein bhi ghar kar liya

Jis ne chuma hai khaak-e-mazaar-e-Nabi
Us ne zarre ko rashk-e-qamar kar liya

Dil mein jis ne basaya hai khauf-e-Khuda
Us ne har gham se khud ko nidar kar liya

Nemat-e-naat Aarif hamein mil gayi
Hum ne taqdeer ko mu’tabar kar liya