Wahi Hain Mere Mustafa

Wahi hain mere Mustafa, wahi hain mere Mustafa

Woh jin ke lutf aam hain, jo rahmat-e-tamaam hain
Jo Sayyid-ul-Anaam hain, jo nabiyon ke imaam hain
Jahaan mein un sa doosra, nahin hai koi ba-Khuda
Jo hain sabhi ke rehnuma, wahi hain mere Mustafa
Wahi hain mere Mustafa, wahi hain mere Mustafa

Khuda ne jin ke waaste, sajayi kaainaat hai
Unhi ki barkaton se is, jahaan ki hayaat hai
Woh afzal-o-azeem hain, raoof hain, raheem hain
Wahi hain sahib-e-ata, wahi hain mere Mustafa
Wahi hain mere Mustafa, wahi hain mere Mustafa

Ishaara kar diya agar, to tukde ho gaya qamar
Jo hukm un ka pa gaya, to paas aa gaya shajar
Palat ke vaapas aa gaya, jo aaftab dooba tha
Ali ne asr ki ada, wahi hain mere Mustafa
Wahi hain mere Mustafa, wahi hain mere Mustafa

Kabhi hain farsh-e-khaak par, to arsh par kabhi guzar
Jo la-makaan talak gaye, wohi hain jag ke taajwar
Jo ghamzadon ke pyaare hain, sabhi ke jo sahaare hain
Gham-o-alam ki hain dawa, wahi hain mere Mustafa
Wahi hain mere Mustafa, wahi hain mere Mustafa

Woh shah-e-kaainaat hain, woh ma’dan-e-sifaat hain
Woh jaan-e-shash jihaat hain, unhin ke din hain, raat hain
Unhin se kul bahaar hai, unhin ka iqtedaar hai
Jo hain sabhi ke muqtada, wahi hain mere Mustafa
Wahi hain mere Mustafa, wahi hain mere Mustafa

Hasan, Husain ki ziya, Batool-e-paak ki rida
Nabi ki aal-e-paak hai, hidaayaton ka raasta
Unhi ke dar ki bheekh se, jahaan saara pal raha
Hai jin ka noori silsila, wahi hain mere Mustafa
Wahi hain mere Mustafa, wahi hain mere Mustafa

Hai Aarif-e-Hazeen ko bhi, unhin ka ek aasra
Unhin ki baargah mein, adab se hai ye lab kusha
Unhin ka naam dil men hai, unhin ki lab pe hai sana
Wahi hain dafe’-e-bala, wahi hain mere Mustafa
Wahi hain mere Mustafa, wahi hain mere Mustafa