Chaman-e-Tayyaba Mein Sunbul Jo Sanware Gaisu

Chaman-e-Tayyaba mein sunbul jo sanware gaisu
Hoor badh kar shikan-e-naz pe waare gaisu

Ki jo baalon se tere roza ki jaroob-kashi
Shab ko shabnam ne tabarrak ko hain dhaare gaisu

Hum siyah-kaaron par ya rab tapish-e-mahshar mein
Saaya afgan hon tere pyare ke pyare gaisu

Charche hooron mein hain dekho to zara baal-e-buraq
Sunbul-e-khald ke qurban utaare gaisu

Aakhir-e-hajj gham-e-ummat mein pareshan ho kar
Teera-bakhton ki shafa’at ko saṅdhare gaisu

Goesh tak sunte the faryaad ab aaye ta-dosh
Ke banein khana-badoshon ko sahaare gaisu

Sookhe dhaanon par hamare bhi karam ho jaaye
Chhaaye rahmat ki ghata banke tumhaare gaisu

Ka’ba-e-jaan ko panhaya hai ghilaaf-e-mushkin
Ud kar aaye hain jo abro par tumhaare gaisu

Silsila pa ke shafa’at ka jhuke padte hain
Saajda-e-shukr ke karte hain ishaare gaisu

Mushk boo kucha ye kis phool ka jhaada unse
Hooriyo anbar-e-saara hue saare gaisu

Dekho Quran mein shab-e-qadr hai ta matla’-e-fajr
Yani nazdeek hain aariz ke woh pyare gaisu

Bheeni khushbu se mahak jaati hain galiyan Wallah
Kaise phoolon mein basaaye hain tumhaare gaisu

Shaan-e-rahmat hai ke shana na juda ho dam-bhar
Seena-chaakon par kuch is darja hain pyare gaisu

Shaana hai panja-e-qudrat tere baalon ke liye
Kaise haathon ne shaha tere sanware gaisu

Uhad-e-paak ki choti se ulajh le shab-bhar
Subah hone do shab-e-eid ne haare gaisu

Muzdah ho qibla se ghanghor ghataayein umdein
Abro par woh jhuke jhoom ke baare gaisu

Taar-e-shiraza-e-majmu’a-e-kaunain hain ye
Haal khul jaaye jo ek dam hoon kinaare gaisu

Tail ki boondein tapakti nahi baalon se Raza
Subah aariz par lataate hain sitaare gaisu