Subah Tayyaba Mein Hui Batta Hai Baara Noor Ka

Subah Taiba mein hui bat’ta hai baara noor ka
Sadqa lene noor ka aaya hai taara noor ka
Bagh-e-Taiba mein suhana phool phoola noor ka
Mast boo hain bulbulen padhti hain kalma noor ka

Barahvin ke chaand ka mujra hai sajda noor ka
Barah burjon se jhuka ek ik sitaara noor ka
Un ke qasr-e-qadr se khuld ek kamra noor ka
Sidra paayein bagh mein nanha sa paudha noor ka

Arsh bhi firdaus bhi us shah-e-wala noor ka
Ye musamman burj woh mushkoo-e-aala noor ka
Aayi bid’at chhayi zulmat rang badla noor ka
Mah-e-sunnat mehr-e-tal’at le le badla noor ka

Tere hi maathe raha ai jaan sehra noor ka
Bakht jaaga noor ka chamka sitaara noor ka
Main gada tu badshah bhar de pyaala noor ka
Noor din doona tera de daal sadqa noor ka

Teri hi jaanib hai paanchon waqt sajda noor ka
Rukh hai qibla noor ka abru hai ka’ba noor ka
Peeth par dhalka sar-e-anwar se shimla noor ka
Dekhein Moosa Toor se utra saheefa noor ka

Taaj wale dekh kar tera imama noor ka
Sar jhukate hain ilahi bol baala noor
Bini-e-purnoor par rakhshan hai buqqa noor ka
Hai liwa-ul-hamd par udta phareera noor ka

Mushaf-e-aariz pe hai khat-e-shafee’a noor ka
Lo siyah kaar-o-mubarak ho qabala noor ka
Aab-e-zar banta hai aariz par paseena noor ka
Mushaf-e-i’jaz par chadhta hai sona noor ka

Pech karta hai fida hone ko lam’a noor ka
Gird-e-sar phirne ko banta hai imama noor ka
Haibat aariz se tharata hai shola noor ka
Kafsh-e-pa par gir ke ban jata hai guppha noor ka

Sham-e-dil mishkat-e-tan seena zuja-e-jah noor ka
Teri soorat ke liye aaya hai soora noor ka
Mail se kis darja suthra hai woh putla noor ka
Hai gale mein aaj tak kora hi kurta noor ka

Tere aage khaak par jhukta hai maatha noor ka
Noor ne paaya tere sajde se seema noor ka
Tu hai saaya noor ka har uzv tukda noor ka
Saaya ka saaya na hota hai na saaya noor ka

Kya bana naam-e-Khuda asra ka dulha noor ka
Sar pe sehra noor ka bar mein shahana noor ka
Bazm-e-wahdat mein maza hoga dobaala noor ka
Milne sham-e-Toor se jaata hai ikka noor ka

Wasf-e-rukh mein gaati hain hoorin tarana noor ka
Qudrati beenon mein kya bajta hai lehra noor ka
Ye kitaab-e-kun mein aaya tufra aaya noor ka
Ghair-e-qa’il kuchh na samjha koi ma’ni noor ka

Dekhne walon ne kuchh dekha na bhala noor ka
Man ra’a kaisa ye aaina dikhaya noor ka
Subah kar di kufr ki sach tha muzhda noor ka
Shaam hi se tha shab-e-teera ko dhadka noor ka

Padti hai noori bharan amda hai dariya noor ka
Sar jhuka ai kisht-e-kufr aata hai ahla noor ka
Naariyon ka daur tha dil jal raha tha noor ka
Tum ko dekha ho gaya thanda kaleja noor ka

Naskh adiyaan kar ke khud qabza bithaya noor ka
Taajwar ne kar liya kacha alaqa noor ka
Jo gada dekho liye jaata hai tora noor ka
Noor ki sarkar hai kya is mein tora noor ka

Bheek le sarkar se la jald kaasa noor ka
Mah-e-nau Tayyaba mein batta hai mahina noor ka
Dekh un ke hote nazeba hai da’wa noor ka
Mehr likh de yaan ke zaron ko muchalka noor ka

Yaan bhi daagh-e-sajda-e-Tayyaba hai tamgha noor ka
Ai qamar kya tere hi maathe hai teeka noor ka
Sham-e-saan ek ek parwana hai us ba-noor ka
Noor-e-haq se lo lagaaye dil mein rishta noor ka

Anjuman wale hain anjam bazm halqa noor ka
Chaand par taron ke jharmat se hai hala noor ka
Teri nasl-e-paak mein hai bachcha bachcha noor ka
Tu hai ain-e-noor tera sab gharana noor ka

Noor ki sarkar se paaya doshala noor ka
Ho mubarak tum ko zun-noorain joda noor ka
Kis ke parde ne kya aaina andha noor ka
Maangta phirta hai aankhein har nageena noor ka

Ab kahan woh taab-sheen kaisa woh tadka noor ka
Mehr ne chhup kar kya khaasa dhundalka noor ka
Tum muqabil the to pahron chaand badhta noor ka
Tum se chhut kar munh nikal aaya zara sa noor ka

Qabr-e-anwar kahiye ya qasr-e-mu’alla noor ka
Charkh-e-atlas ya koi saada sa qubba noor ka
Aankh mil sakti nahin dar par hai pehra noor ka
Taab hai be-hukm par maare parinda noor ka

Naz’ mein loutega khaak-e-dar pe sheida noor ka
Mar ke odhegi aroos-e-jaan dupatta noor ka
Taab-e-mehr-e-hashar se chounke na kushta noor ka
Bondiyan rahmat ki dene aayen chheenta noor ka

Waz-e-wazi’ mein teri soorat hai ma’ni noor ka
Yun majazan chaahein jis ko kah dein kalma noor ka
Anbiya ajza hain tu bilkul hai jumla noor ka
Is alaqe se hai un par naam sachcha noor ka

Ye jo mehr-o-mah pe hai itlaq aata noor ka
Bheek tere naam ki hai iste’ara noor ka
Surmagi aankhein harim-e-haq ke woh mushkin ghazal
Hai faza-e-la-makan tak jin ka ramna noor ka

Taab-e-husn-e-garm se khil jayenge dil ke kanwal
Nau bahaaren laayega garmi ka jhalka noor ka
Zarre mehr-e-quds tak tere tawassut se gaye
Hadd-e-ausat ne kiya sughra ko kubra noor ka

Sabza-e-gardoon jhuka tha behr-e-pa-boos-e-buraq
Phir na seedha ho saka khaya woh kora noor ka
Taab-e-sham se choundhiya kar chaand unhen qadmon phira
Hans ke bijli ne kaha dekha chhalaawa noor ka

Deed-e-naqsh-e-sum ko nikli saat pardo se nigaah
Putilian bolein chalo aaya tamasha noor ka
Aks-e-sum ne chaand suraj ko lagaye chaar chaand
Pad gaya seem-o-zar-e-gardoon pe sikka noor ka

Chaand jhuk jata jidhar ungli uthate mahd mein
Kya hi chalta tha ishaaron par khilona noor ka
Ek seena tak mushaba ik wahan se paon tak
Husn-e-sibtayn un ke jamon mein hai nima noor ka

Saaf shakl-e-paak hai donon ke milne se ayaan
Khat-e-tawam mein likha hai ye do warqa noor ka
Kaf geesu ha dahan ya abru aankhen ain sad
Kaf ha ya ain sad un ka hai chehra noor ka

Ai Raza ye Ahmad-e-Noori ka faiz-e-noor hai
Ho gayi meri ghazal badh kar qaseeda noor ka