Bade latīf hain, nāzuk se ghar meñ rahte hain

Bade latīf hain, nāzuk se ghar meñ rahte hain
Mere huzūr merī chashm-e-tar meñ rahte hain

Hamāre dil meñ, hamāre jigar meñ rahte hain
Unhī ke ghar hain, vo apne hī ghar meñ rahte hain

Ye wāqi’ā hai libās-e-bashar bhī dhokā hai
Ye mo’jizā hai libās-e-bashar meñ rahte hain

Maqām un kā na farsh-e-zamīñ, na ‘arsh-e-barīñ
Vo apne chāhne vāloñ ke ghar meñ rahte hain

Malā’ika bhī ‘aqīdat se dekhte hain unheñ
Jo ḵẖush-nasīb nabī ke nagar meñ rahte hain

Yaqīn vāle kahāñ se chale kahāñ pahuñche
Jo ahl-e-shak haiñ agar meñ magar meñ rahte hain

ḵẖudā ke nūr ko apnī tarah samajhte hain
Ye kaun log hain? Kis ke asar meñ rahte hain?

Raheñ vo apnoñ se ġhāfil, are ma’āzallāh!
ḵẖushā-nasīb ham un kī nazar meñ rahte hain

Vo aur hī thā jo qausain par nazar āyā
Malak to apnī hadd-e-bāl-o-par meñ rahte hain

Jo, aḵẖtar! un ke tasavvur meñ subḥ-o-shām kareñ
Kahīñ bhī rahte hoñ, tayyaba nagar meñ rahte hain