Ham Ko Apni Talab Se Siwa Chahiye

ham ko apni talab se siwa chahiye
Aap jaise hain waisi ata chahiye

kyun kahun ye ata wo ata chahiye
unko maloom hai ham ko kya chahiye

bharke jholi meri mere Sarkaar ne
muskura kar kaha aur kya chahiye

Unke dar se to sab kuchh milega magar
Apna kirdar bhi dekhna chahiye

ik qadam bhi na ham chal sakenge Huzoor
har qadam par karam Aap ka chahiye

Ye dawa chahiye ye shifa chahiye
Aap raazi rahen aur kya chahiye

ishq me aapke ham tadapte to hain
har tadap me bilali ada chahiye

apne qadmo ka dhovan ata kijiye
ham mareezon ko aabe shifa chahiye

dard -e- jaami mile naat khalid likhun
aur andaaze ahmad raza chahiye