Jab Tak Jiyun Main Aaqa Koi Gham Na Paas Aaye

Jab tak jiyun main aaqa koi gham na paas aaye
Jo marun to ho lahad par teri rehmaton ke saaye

Hai khiza ne daale dere, murjha gaye hain sab gul
Mere ujde baagh mein phir aaqa bahaar aaye

Meri zindagi ka maqsad ho e kaash! ishq-e-ahmad
Mujhe maut bhi jo aaye isi justjoo mein aaye

Mujhe maut zindagi de, mujhe zindagi maza de
Jo kitaab-e-zindagi par mohar apni woh lagaaye

Tu basa de mere dil mein haan! usi ki yaad maalik
Woh jo waqt-e-naz’aa aakar kalma bhi yaad dilaaye

Na to kar saka hai koi, na karega pyaar aisa
Jo lahad mein aashiqon ko de ke thapkiyaan sulaaye

Woh diya jo bujh gaya tha, woh jo kho gayi thi soozan
Huwa har taraf ujaala jo huzoor muskuraaye

Chali aandhiya ghamon ki, giri bijliyaan dukhon ki
Ye tera karam hai aaqa ke kadam na ladkhadaaye

Jise maara ho ghamon ne, jise ghera ho dukhon ne
Mera mashwara hai us ko woh madina ho ke aaye

Dare-yaar par pada hoon, is usool par gira hoon
Jo gira huwa ho khud hi use kaun ab giraaye

Main ghulaam-e-panjetan hoon, na samajhna besahara
Main hoon ghous ka deewana, koi haath to lagaaye

Yahi aarzu dili hai teri bazm mein kisi din
Ye tera ubaiyd aaye, tujhe naat bhi sunaaye