Kaash Ek Baar Madine Men Bulaayein Aaqa

Kaash ek baar Madine mein bulaayein Aaqa
Rauza-e-noor ka deedaar, karaayen Aaqa

Mujh ko tasleem hai sar ta pa gunahgaar hoon mein
Ek shafqat ki nazar daal, bachaayen Aaqa

Haan! Main chhota hoon, magar aaj badi baat kahoon
Khaak-e-na’layn-e-mubarak pe bithaayen Aaqa

Meri taqdeer pe taqdeer bhi naazaan ho jaaye
Ek shab kaash mere khwaab men aayen Aaqa

Mujh gunahgaar pe rahmat ki nazar ho jaaye
Jab Nakeerain, miri qabr men aayen Aaqa

Dekh jannat ki bahaaren bhi magan ho jaayen
Qabr men thapkiyaan de ke jo sulaayen Aaqa

Garmi-e-hashr men jab pyaas se be-taabi ho
Apne haathon se mujhe jaam pilaayen Aaqa

Yeh tamanna hai mere dil ki badi muddat se
Aap ki naat Madine men sunaayen Aaqa

Be-sabab naar se meri bhi rihaai ho jaaye
Roz-e-mahshar jo mujhe aap bachaayin Aaqa

Kaash jannat mei jawaar aap ka ho jaaye naseeb
Phir to hum khushiyon se phoole na samaayin Aaqa

Jab amal Aarif-e-aasi ka ho meezaan pe kam
Aise aalam min ise aake bachaayin Aaqa