Pesh-e-Haq Muzhda-e-Shafa’at Ka Sunate Jaayenge

Pesh-e-Haq muzhda-e-shafa’at ka sunate jaayenge
Aap rote jaayenge hum ko hansate jaayenge

Dil nikal jaane ki jagah hai aah kin aankhon se woh
Hum se pyaason ke liye dariya bahaate jaayenge

Kushtagan-e-garmi-e-mahshar ko woh jaan-e-Maseeh
Aaj daaman ki hawa de kar jilaate jaayenge

Gul khilega aaj yeh unki naseem-e-faiz se
Khoon rote aayenge hum muskuraate jaayenge

Haan chalo hasrat-zada sunte hain woh din aaj hai
Thi khabar jis ki ki woh jalwa dikhaate jaayenge

Aaj eid-e-ashiqaan hai gar khuda chahe ki woh
Abru-e-payvasta ka aalam dikhaate jaayenge

Kuchh khabar bhi hai faqeero aaj woh din hai ki woh
Nemat-e-khald apne sadqe mein lutaate jaayenge

Khaak-e-ufadaa bas unke aane hi ki der hai
Khud woh gir kar sajda mein tum ko uthaate jaayenge

Wusatein di hain khuda ne daaman-e-mahboob ko
Jurm khulte jaayenge aur woh chhupaate jaayenge

Lo woh aaye muskuraate hum aseeron ki taraf
Kharman-e-isyaan par ab bijli giraate jaayenge

Aankh kholo gham-zada dekho woh giriya aaye hain
Lauhe-dil se naqsh-e-gham ko ab mitaate jaayenge

Sokhta jaanon par woh pur-josh rahmat aaye hain
Aab-e-kauthar se lagi dil ki bujhaate jaayenge

Aaftab unka hi chamkega jab auron ke chiragh
Sarsar-e-josh-e-bala se jhilmlaate jaayenge

Paaye kuba pul se guzrenge teri aawaaz par
Rabbe sallam ki sada par wajd laate jaayenge

Sarvar-e-deen lijiye apne naatavaanon ki khabar
Nafs-o-shetaan sayyadaa kab tak dabaate jaayenge

Hashar tak daalenge hum paidaish-e-Maula ki dhoom
Misl-e-Faris-e-Najd ke qile giraate jaayenge

Khaak ho jayen adu jal kar magar hum to Raza
Dam mein jab tak dam hai zikr unka sunaate jaayenge