Sab Se Awwal O Aala Hamara Nabi

Sab se awwal o aala hamaara nabi
Sab se baala o vaala hamaara nabi

Apne maula ka pyaara hamaara nabi
Dono aalam ka duulha hamaara nabi

Bazm-e-aakhir ka shama farozaan hua
Noor-e-awwal ka jalva hamaara nabi

Jis ko shayaan hai arsh-e-khuda par juloos
Hai wo sultan-e-vaala hamaara nabi

Bujh gayin jis ke aage sabhi mashalein
Shama wo lekar aaya hamaara nabi

Jis ke talvon ka dhuvan hai aab-e-hayaat
Hai wo jaan-e-maseeha hamaara nabi

Arsh o kursi ki theen aaeena bandiyan
Sooye haq jab sidhara hamaara nabi

Khalq se auliya auliya se rusul
Aur rasoolon se aala hamaara nabi

Husan khaata hai jis ke namak ki qasam
Wo maleeh-e-dil aara hamaara nabi

Zikr sab pheeke jab tak na mazkoor ho
Namakin husan vaala hamaara nabi

Jis ki do boond hain kausar o salsabeel
Hai wo rahmat ka dariya hamaara nabi

Jaise sab ka khuda ek hai vaise hi
In ka un ka tumhaara hamaara nabi

Qarnon badli rasoolon ki hoti rahi
Chand badli ka nikla hamaara nabi

Kon deta hai dene ko munh chahiye
Dene vaala hai sachcha hamaara nabi

Kya khabar kitne taare khile chhup gaye
Par na doobe na dooba hamaara nabi

Mulk-e-kaunain mein anbiya tajdaar
Tajdaaron ka aaqa hamaara nabi

La-makaan tak ujaala hai jis ka wo hai
Har makaan ka ujaala hamaara nabi

Saare acchon mein achha samajhiye jise
Hai us achche se achha hamaara nabi

Saare oonchon mein ooncha samajhiye jise
Hai us oonche se ooncha hamaara nabi

Anbiya se karoon arz kyon maaliko!
Kya nabi hai tumhaara hamaara nabi

Jis ne tukde kiye hain qamar ke wo hai
Noor-e-vahdat ka tukda hamaara nabi

Sab chamak vaale ujlon mein chamka kiye
Andhe sheesho mein chamka hamaara nabi

Jis ne murda dilon ko di umr-e-abad
Hai wo jaan-e-maseeha hamaara nabi

Ghamzadon ko Raza mazhda dijiye ki hai
Bekson ka sahaara hamaara nabi