Ye Waqar-o-Shan Ye Shaukat Rasoolullah Ki

Ye waqar-o-shan ye shaukat Rasoolullah ki
Ye hukumat aur ye satwat Rasoolullah ki
Shan-e-Laulaka-lama khil’at Rasoolullah ki
‘Arsh-e-haq hai masnad-e-rif’at Rasoolullah ki
Dekhni hai hashsh mein ‘izzat Rasoolullah ki

Kis-qadar pur-noor hai surat Rasoolullah ki
Deed-e-haq hai bil-yaqeen ruyat Rasoolullah ki
Marhaba ye shan ye ‘azmat Rasoolullah ki
‘Arsh-e-haq hai masnad-e-rif’at Rasoolullah ki
Dekhni hai hashsh mein ‘izzat Rasoolullah ki

Footenge kunj-e-lahad se apni saut-e-noor ke
Jhilmilaenge shab-e-marqad mein lam’e noor ke
Is-qadar bhar jaenge barzakh mein jalwe noor ke
Qabr mein lahraenge ta-hashsh chashme noor ke
Jalwa farma hogi jab tal’at Rasoolullah ki

Hoo-ba-hoo qahr-e-Khuda-e-paak thi barq-e-ghazab
Pooch un ka kya hua jin par padi barq-e-ghazab
Allah Allah khaak-e-hasti kar gai barq-e-ghazab
Kafiron par tegh-e-wala se giri barq-e-ghazab
Abr aasa chha gai haibat Rasoolullah ki

Dekh le tu daman-e-khairat kya un se mila
Do-jahan un se mile, be-intiha un se mila
Is se aage aur kya bolun Khuda un se mila
La-wa-rabbil-‘arsh jis ko jo mila un se mila
Batti hai kaunain mein ne’mat Rasoolullah ki

Thokrein khata raha jo un se mustaghni hua
Laiq-e-ibrat bana jo un se mustaghni hua
Ho ke be-iman mara jo un se mustaghni hua
Wo jahannam mein gaya jo un se mustaghni hua
Hai Khalilullah ko hajat Rasoolullah ki

Dar-ba-dar phirta raha jo un se mustaghni hua
Har jagah ruswa hua jo un se mustaghni hua
Rah-e-jannat se phira jo un se mustaghni hua
Wo jahannam mein gaya jo un se mustaghni hua
Hai Khalilullah ko hajat Rasoolullah ki

Hum ne seekhe hain isi maktab se aadab-e-huzoor
Hum isi may-khane se pite hain may-e-naab-e-huzoor
Har jagah pehchan hai apni shifayab-e-huzoor
Ahl-e-sunnat ka hai bera paar, ashab-e-huzoor
Najm hain aur nao hai ‘itrat Rasoolullah ki

Hum wo khush-qismat hain un ki yaad mein rona mila
Aur sile mein aankh ko deedar ka hona mila
Qabr aisi khuld ka jaise koi kona mila
Khaak ho kar ‘ishq mein aaram se sona mila
Jaan ki iksir hai ulfat Rasoolullah ki

Ma-wara idrak se hai husn-e-a’za-e-huzoor
Aap ka humsar kahan se koi le aaye huzoor
Aap kya hain kaun samjhe kaun samjhaye huzoor
Hai gul-e-bagh-e-qudus rukhsar-e-zeba-e-huzoor
Sarw-e-gulzar-e-qidam qamat Rasoolullah ki

Waise to, Razi! har ik insaan hai maddah-e-huzoor
Ek ik ye gosha-e-imkan hai maddah-e-huzoor
Har zaban-o-har-dil-e-hairan hai maddah-e-huzoor
Ai Raza! khud sahib-e-Quran hai maddah-e-huzoor
Tujh se kab mumkin hai phir midhat Rasoolullah ki