Zameen O Zaman Tumhare Liye

Zameen o zamaan tumhaare liye, makeen o makaan tumhaare liye
Chunin o chuna tumhaare liye, bane do jahaan tumhaare liye

Dahan mein zaban tumhaare liye, badan mein hai jaan tumhaare liye
Hum aaye yahan tumhaare liye, uthen bhi wahaan tumhaare liye

Farishte khidam, rasool hisham, tamaam umam gulaam-e-karam
Wujood o adam hudood o qadim, jahaan mein ayan tumhaare liye

Kaleem o naji, maseeh o safi, khaleel o razi, rasool o nabi
Ateeq o wasi, ghani o ali, sana ki zaban tumhaare liye

Isalat-e-kul, imamat-e-kul, siyadat-e-kul, imarat-e-kul
Hukumat-e-kul, wilayat-e-kul, khuda ke yahan tumhaare liye

Tumhaari chamak, tumhaari damak, tumhaari jhalak, tumhaari mahak
Zameen o falak, simaak o samak, mein sikka nishaan tumhaare liye

Woh kanz-e-nihan, yeh noor-e-fishaan, woh kun se ayan, yeh bazm-e-faka
Yeh har tan o jaan, yeh bagh-e-jinaan, yeh saara samaa tumhaare liye

Zahoor-e-nihan, qayam-e-jahan, rukoo-e-mihan, sujood-e-shahan
Niyaazen yahan, namazen wahaan, yeh kis liye haan tumhaare liye

Yeh shams o qamar, yeh shaam o sahar, yeh barg o shajar, yeh bagh o samar
Yeh tegh o sipar, yeh taj o kamar, yeh hukm rawaan tumhaare liye

Yeh faiz diye, woh jood kiye, ke naam liye zamaana jiye
Jahaan ne liye tumhaare diye, yeh ikramiyaan tumhaare liye

Sahab-e-karam rawaana kiye, ke aab-e-niam zamaana piye
Jo rakhte the hum woh chaak siye, yeh satr-e-badan tumhaare liye

Sana ka nishaan, woh noor fishaan, ke mehrwishaan ba-anhumah shaan
Basayah kashaan, mawakib shaan, yeh naam o nishaan tumhaare liye

Ata-e-arab, jala-e-karb, fuyooj-e-ajab, baghair talab
Yeh rahmat-e-rabb hai kis ke sabab, barabb-e-jahaan tumhaare liye

Zunoob fana, uyooB habaa, quloob safa, khutoob rawa
Yeh khoob ata, kuroob zuda, pa-e-dil o jaan tumhaare liye

Na jinn o bashar, ke aathon pehar, malaika dar pe basta kamar
Na jubba o sar, ke qalb o jigar, hain sajda kunaa tumhaare liye

Na rooh-e-ameen, na arsh-e-bareen, na lauh-e-mubeen, koi bhi kahen
Khabar hi nahin jo ramzen khilen, azal ki nihan tumhaare liye

Jinaan mein chaman, chaman mein saman, saman mein phaban, phaban mein dilhan
Saza-e-mihan pe aise minan, yeh amn o amaan tumhaare liye

Kamaal-e-mihan, jalaal-e-shahan, jamaal-e-hisaan mein tum ho ayan
Ke saare jahaan mein roze fakan, zill-e-aeena saan tumhaare liye

Yeh toor kuja, sipihr to kya, ke arsh-e-ula bhi door raha
Jihat se wara, wisaal mila, yeh rifaat-e-shaan tumhaare liye

Khaleel o naji, maseeh o safi, sabhi se kahi, kahen bhi bani
Yeh be-khabri ke khalq phiri, kahan se kahan tumhaare liye

Bafaur-e-sada, samaa yeh bandha, yeh sidra utha, woh arsh jhuka
Sufoof-e-sama ne sajda kiya, hui jo azaan tumhaare liye

Yeh marhamaten, ke kachi maten, na chhoren laten, na apni gaten
Qasoor karen, aur un se bharen, qasoor-e-jinaan tumhaare liye

Fana badarat, baqa babarat, za har do jihat, ba-gard-e-sarat
Hai markaziyat tumhaari sifat, ke dono kamaan tumhaare liye

Ishaare se chaand cheer diya, chhupe hue khur ko pher liya
Gaye hue din ko asr kiya, yeh taab o tawaan tumhaare liye

Saba woh chale, ke baagh phale, woh phool khile, ke din hon bhale
Lawa ke tale, sana mein khile, Raza ki zaban tumhaare liye