Hajiyo! Aao Shahnshah Ka Rauza Dekho

Hajiyo! Aao shahnshah ka rauza dekho
Kaaba to dekh chuke kaaba ka kaaba dekho

Rukn-e-shami se mitti wahshat-e-sham-e-ghurbat
Ab madina ko chalo subh-e-dil ara dekho

Aab-e-zamzam to piya khoob bujhaayein pyaasin
Aao jood-e-shah-e-kausar ka bhi dariya dekho

Zair-e-mezaab mile khoob karam ke chheente
Abr-e-rahmat ka yahan zor barasna dekho

Dhoom dekhi hai dar-e-kaaba pe betaabon ki
Un ke mushtaaqon mein hasrat ka tarapna dekho

Misl-e-parwana phira karte the jis sham ke gird
Apni us sham ko parwana yahan ka dekho

Khoob aankhon se lagaya hai ghilaaf-e-kaaba
Qasr-e-mahbub ke parde ka bhi jalwa dekho

Waan muteeon ka jigar khauf se paani paaya
Yaan siyah kaaron ka daman pe machalna dekho

Awwaleen khanah-e-haq ki to ziyaayein dekhein
Aakhareen bait-e-nabi ka bhi tajalla dekho

Zeinat-e-kaaba mein tha laakh aruson ka banao
Jalwa farma yahan kaunain ka dulha dekho

Aiman-e-toor ka tha rukn-e-yamani mein forogh
Shola-e-toor yahan anjuman ara dekho

Mehr-e-madar ka maza deti hai aaghosh-e-hateem
Jin pe maa baap fida yaan karam un ka dekho

Arz-e-haajat mein raha kaaba kafeel-e-injaah
Aao ab dad rasi-e-shah-e-tayyaba dekho

Dho chuka zulmat-e-dil bosa-e-sang-e-aswad
Khaak bosi-e-madina ka bhi rutba dekho

Kar chuki rifaat-e-kaaba pe nazar parwaazein
Topi ab thaam ke khaak-e-dar-e-waala dekho

Be-niyazi se wahan kaanpti paayi taa-at
Josh-e-rahmat pe yahan naaz-e-gunah ka dekho

Jumma-e-makka tha eed ahl-e-ibaadat ke liye
Majrimo! aao yahan eed-e-doshanba dekho

Multazim se to gale lag ke nikale armaan
Adab o shauq ka yaan baaham ulajhna dekho

Khoob mas-a mein ba-mid-e-safa daud liye
Rah-e-jaanaan ki safa ka bhi tamasha dekho

Raqs-e-bismil ki bahaarein to mina mein dekhein
Dil-e-khoon naba feshaan ka bhi tarapna dekho

Gaur se sun to Raza kaaba se aati hai sada
Meri aankhon se mere pyare ka rauza dekho