Paat Woh Kuch Dhaar Yeh Kuch Zaar Hum

Paat woh kuch dhaar yeh kuch zaar hum
Ya Ilahi kyun kar utrein paar hum

Kis bala ki may se hain sarshaar hum
Din dhala hote nahin hushyaar hum

Tum karam se mushtare har aib ke
Jins-e-naamqbool-e-har bazaar hum

Dushmanon ki aankh mein bhi phool tum
Doston ki bhi nazar mein khaar hum

Laghzish-e-pa ka sahara ek tum
Girne waale laakhon na-henjaar hum

Sadqa apne baazuon ka al-madad
Kaise torain ye but-e-pindaar hum

Dam qadam ki khair ai jaan-e-Maseeh
Dar pe laaye hain dil-e-bimaar hum

Apni rehmat ki taraf dekhen huzoor
Jaante hain jaise hain badkaar hum

Apne mehmaanon ka sadqa ek boond
Mar mite pyaase idhar sarkaar hum

Apne kooche se nikala to na do
Hain to had bhar ke khudai khwaar hum

Haath utha kar ek tikda ai kareem
Hain sakhi ke maal mein haqdaar hum

Chaandni chhatki hai un ke noor ki
Ao dekhen sair Toor o Naar hum

Himmat ai zaaf un ke dar par gir ke hon
Be-takalluf saaya-e-dewaar hum

Ba-ata tum shah tum mukhtaar tum
Be-nawa hum zaar hum naachaar hum

Tum ne to laakhon ko jaanen pher deen
Aisa kitna rakhte hain aazaar hum

Apni sattaari ka yaarab waasta
Hon na ruswa bar sar-e-darbaar hum

Itni arz-e-aakhri keh do koi
Nao tooti aa pade manjhdhaar hum

Munh bhi dekha hai kisi ke afw ka
Dekh ai asiyaan nahin be-yaar hum

Main nisaar aisa musalmaan kije
Tor daalen nafs ka zunnar hum

Kab se phailaaye hain daaman tegh-e-ishq
Ab to paayen zakhm-e-daamandaar hum

Sunniyat se khatke sab ki aankh mein
Phool ho kar ban gaye kya khaar hum

Na-tawaani ka bhala ho ban gaye
Naqsh-e-paaye taalibaan-e-yaar hum

Dil ke tukde nazr-e-haazir laaye hain
Ai sagaan-e-koocha-e-dildaar hum

Qismat-e-Saur o Hira ki hirs hai
Chahte hain dil mein gehra ghaar hum

Chashm poshi o karam shaan-e-shuma
Kaar-e-maa be-baaki o israar hum

Fasl-e-gul sabza saba masti shabaab
Chhoren kis dil se dar-e-khummaar hum

Maikada chhutta hai lillaah saaqiya
Ab ke saagar se na hon hushyaar hum

Saaqi-e-tasneem jab tak aa na jaayen
Ai seyah masti na hon hushyaar hum

Naazishein karte hain aapas mein malak
Hain ghulaamaan-e-shahe abraar hum

Lutf-e-az khud raftagi yaarab naseeb
Hon shaheed-e-jalwa-e-raftaar hum

Un ke aage da’wa-e-hasti Raza
Kya bike jaata hai ye har baar hum